MANTEB.com - Jrone mengeti kamardikan RI kang kaping sewidak pitu, kanoman ing Pantai Goa Cemara Bantul nguculake tukik menyang habitate ing segara. Para pelancong ing Pantai Goa Cemara uga diwenehi kalodhangan ngeculake tukik ing segara kanthi cara diadopsi lan mbayar saben tukik sepuluh ewu rupiah.

Supaya warga luwih nresnani lan perduli tumrap habitat penyu laut, Pemkab Bantul lan kanoman Pantai Goa Cemara nggelar lelang marang pelancong kanggo ngadopsi penyu kang bakal diuculake ing segara. Kegiatan kanggo mengeti Kamardikan RI kang kaping-67 kasebut ngandhut ancas kanggo menehi pengalaman tumrap peserta kang ngadopsi, satemah bisa ngrasakake kanthi langsung nguculake tukik menyang habitate ing segara.

Panitia nyamektakake paket pilihan cacah telu jrone ngadopsi saben tukik kang bakal diculake. Paket kang sepisan yaiku lelang sepuluh ewu rupiah kanthi fasilitas gratis mlebu menyang Pantai Gua Cemara, souvenir lan diwenehi kalodhangan nguculake tukik. Paket kang kapindho yaiku lelang rong puluh ewu rupiah kanthi fasilitas gratis mlebu Pantai Gua Cemara, souvenir, nguculake tukik lan mangan buka pasa. Dene paket kang kaping telu yaiku lelang selawe ewu rupiah, fasilitase padha karo paket kaping loro nanging ana menu tambahan tumrap panganan kanggo buka pasa. Sawijine siswa SD saka Jakarta, Raka nelakake seneng melu kegiatan kasebut. Nguculake tukik menyang segara mujudake pengalaman kang ora bisa dilalekake. (Purwanto - Bantul)