MANTEB.com - Adhedhasar pangawat-awat ing sakehing agen karcis ing Terminal Madureso Temanggung, nganti rong dina sadurunge bakdo wingi kang mesen karcis bali menyang sakehing kutha gedhe ing Jawa mligine ing Jakarta pancen mundhak, nanging ora rame kaya dene arus balik taun wingi. Kang pesen karcis paling rame kedadeyan kanggo budhal tanggal telu likur nganti pat likur Agustus.

Rega karcis mundhak nganti tikel loro. Rega karcis jurusan Jakarta kanggo bis fasilitas AC VIP saka rega sakawit satus rong puluh ewu kanggo saben pawongan mundhak dadi rong atus wolung puluh ewu rupiah. Dene rega karcis kanggo saben pawongan bis AC Patas kang rega sakawit satus ewu rupiah dadi rong atus seket ewu rupiah. Sawetara tumrap kelas bisnis rega sakawit wolung puluh lima ewu rupiah mundhak dadi satus sewidak ewu rupiah lan kelas ekonomi saka rega sakawit pitung puluh lima ewu rupiah kanggo saben pawongan mundhak dadi satus seket ewu rupiah.

Sakehing agen ngaku kapeksa ngundhakake rega karcis amarga pancen dijaluk saka perusahaan jasa angkutan. Undhak-undhakan rega kasebut kanggo nutupi ragad operasional.

Sawetara warga mung bisa pasrah amarga ora ana pilihan liya kajaba tuku. Nggunakake bis isih dadi sawijine pilihan kang paling apik tumrap saperangan warga amarga kabiji luwih aman katandhingake numpak pit montor. (Rahardian Setiawan - Temanggung)